ANG BUWAD SA BORBON

By tagaborbon | January 15, 2009

This is an author’s tribute to the dried fish “buwad” vendors of Borbon. The vendors who play an important role in providing Borbonanons with their appetizing commodity “buwad” and genuine service with a smile amid a forceful whiff from their goods.

ANG BUWAD SA BORBON

By: Taga-ubos, Mga Pangingahay sa Kinabuhi

Bation ko ang sobrang kahinangop kong magsing-abot na ang adlaw’ng Dominggo kay pinaka-espesyal kini nga adlaw para kanako. Momata’g sayo sa buntag para manilhig sa tugkaran human maligo aron limpyo ang panumduman nga motambong sa unang misa sa San Sebastian. Bitbit ang mga patulun-ang gibatbat ni Padre Caballes, magdali’g balik ug lugsong pauli adto agi sa bakilid nga dalan paingon sa merkado. Mao kini ang kanunay’ng mobalik-balik sa akong panumduman bisan ug sobra na sa napulo ka katuigan ang nanglabay.

Apan ang makapadasig pag-ayo sa tanan kong moabot na ang adlaw’ng Domingo, mao ang baho sa buwad nga nangalimyon sa dihang dipangladlad na sa mga tindera sa luyo sa merkado ang ilang mga tinda. Dili ikabaylo ang kalami sa buwad bolinaw sa tinda nga humba kaniadto sa akong nanay diin naglutaw-lutaw ang mga bidli sa baboy niini.

Modalikyat gidayon ko paingon sa kinaluyohang bahin sa merkado para mangita sa akong paboritong buwad bolinaw. Sa nagpadulong pa lang, mga kasikas sa mga suki ni Nang Maret dinuyugan sa singgit ni Noy Boy ug ni Noy Porito uban sa mga puntos sa tigbakay ang akong naaninaw sa unahan. Pagkasadya ug pagkanindot pamation nga bisan sa kamingaw sa atong lungsod, ang kasikas sa mga paninda sa merkado nagpadayon gihapon pagtagbaw sa atong mga lumad nga lumulupyo.

Bitbit ang tagtunga ka kilo nga buwad bolinaw, mapahiyumon na’kong gahuna-huna nga kini mosulbad na sa usa ka semanang ‘budget’ sa akong kaon didto sa dakbayan diin gipadayon ko ang akong pagpanimpad nga makatiwas ug eskwela sa kolehiyo. Ug kong mapul-an na’g kinaon sa kaparat niini, mag-ilis gidayon ko sa akong paborito ug walay kapul-anang soup of the day nga “Lucky Me” apan pinaresan gihapon ug side item nga buwad.

Dakong tabang para kanako ang buwad nga pagapaliton ko didto sa merkado sa Borbon. Ug mas dakong tabang ang mga tindera sa buwad diin wala nila igsapayan ang kanunayng baho sa buwad nga ilang gihanggap kada tabo sa merkado matagaan lang ug igong katagbawan ang ilang mga suki sama kanako.

Sa mga tindera ug buwad diha sa merkado sa Borbon, daghang salamat kaninyo.